Indipendenza, Politica

Paulu, no votamus pro apedhare a sa luna

Ricevo e volentieri pubblico questa lettera di Mario Puddu. Rimango dell’idea che non dobbiamo pronunciare giudizi severi contro chi non la pensa come noi. Non serve strappare le schede elettorali, ma accumulare le schede di chi vota per la Sardegna. Non ribelli, ma profondamente riformisti. Mi piace l’idea dell’allenamento alla dipendenza che tanti anni di autonomismo hanno prodotto. Inauguriamo gli anni invece dell’allenamento alla responsabilità.

Salude, Paulu!
Apo apretziadu meda totu su chi iscries e contas fintzas a propósitu de custas eletziones de su Parlamentu italianu, chirchendhe de fàghere fortza paris sos Sardos in Sardigna pro sos Sardos.
S’idea mia est chi tocat a resèssere a pònnere sos Sardos de sos partidos italianos comente narant in italianu “con le spalle al muro” ma no pro los fusilare: solu cundennados a mustrare chi sunt sa cadena chi nos impicat a s’Istadu italianu pro torracontos personales in càmbiu de unu disastru generale de sa Sardigna (e no so pessendhe a sas cosas ‘peus’, tipu ‘finanze’, disastros ambientales, ocupatzione militare e àteras porcherias: pesso solu chi totu s’allenamentu chi nos faghent fàghere, de s’Istadu cun totu su chi est a sos partidos e sindhacados italianos ‘democratici’ – e no chirchemus àteru, chentza mancu ch’essire “in coranta mois” ca deo bi ponzo fintzas su chi faghent preíderos e píscamos –, est a sa dipendhéntzia e no resessimus a cumprèndhere ite dannu, disastru umanu económinu e políticu est).
Ma comente?
Su chi depimus assolutamente fàghere sos Sardos est su chi iscries tue: convergenza nazionale, unidade de e pro sa Sardigna de totu cudhos, però, chi zughent ogros po abbaidare, origras po iscurtare, conca pro pessare, cusséntzia pro distínghere, limba pro faedhare e manos pro fàghere òperas de paghe. E deabberu nudha bi isperaia in carchi cambiamentu de sos piddistas (ma su PDS azis fatu bene a bi proare, e pro no faedhare de sos àteros dipendhentistas).
Oe faedhas de obiezione di coscienza: cosa chi assumancu totu sos indipendhentistas o de ideas da custas bandha depiaimus fàghere, a su postu de mandhare ‘onorevoles’ pro apedhare a sa luna in su Parlamentu italianu.
Depimus cundennare sos dipendhentistas a èssere sos solos e pagos rapresentantes de s’impicu ‘democraticu’ de sa Sardigna, ca si no resessimus a che catzare sos partidos italianos dae Sardigna o a los torrare ai minimi termini nois amus a sighire a èssere in manos de totu sos inganneris ed illusionistas.
Est de meda chi deo fato sempre sa menzus ipótesi possíbbile (e miraculosa!!!) de unidade de totu sos Sardos inderetura in d-unu únicu partidu sardu pro andhare a una boghe a su Parlamentu italianu.  E a  ite? Pro ndhe batire un’àteru punzu de musca, però!!! Pro fàghere bucos in s’abba a trivella e no cun s’agu, ma solu bucos ca no semus faghindhe contu de su chi est su raportu istóricu seculare de sa Sardigna cun s’Itàlia. Fintzas si s’ipótesi tua tzertu chi teniat e tenet sensu de importàntzia istraordinària e bonu e no solu ca s’unidade de sos Sardos est cosa chi s’Itàlia no s’ispetat ma mescamente ca no la cheret ca tiat èssere abberu una rivolutzione fintzas pro fàghere un’àteru bucu in s’abba. S’Itàlia nos dividit, est sa divisione e disunidade de sos Sardos e si nois ponimus unu solu passu versu s’Itàlia semus automaticamente e matematicamente divisos a iscórriu e disunidos che crabas salarzadas e badhinosas puru.
Deo so de tres legisladuras chi no so votendhe pro mandhare mancu unu sardu a su Parlamentu italianu. Ma no m’irméntigo de votare e mancu de fàghere contu de su chi podet contare su votighedhu meu fintzas si balet unu milionésimu e prus pagu puru: sa demogratzia est demogratzia. Andho a votare e a su Presidente de su ségiu bi la torro coram populo segada a biculedhos. Mi ant denuntziadu e fatu su ‘dibbatimentu’ puru! Segamentu de matza ca carchi ispesa mi l’ant fata fàghere, ma de cundenna mancu fragu. Fintzas si aia suportadu cussu puru, ca no poto baliare s’ingannu fatu a sistema puru.
Tandho, si resessides nessi a fàghere s’unidade de cunvergéntzia natzionale so dispostu puru a votare e fàghere votare custa, ma sinono s’obbietzione de cusséntzia mia ti la poto assigurare: s’ischeda mia bi la frundho in terra cun disprétziu fata a biculedhos chi ndhe la depant collire che arga cun s’iscóbulu a mundhadura. Cherzo isperare ancora carchi cosa nessi comente propones tue, ma sinono s’obbietzione mia est assigudada gai.
Cun sos menzus saludos pro totugantos, fintzas a sos dipendhentistas (e no solu ca sinono tocat a los peleare malàidos puru, ma ca a istimare tocat abberu a istimare a totugantos, isperendhe puru chi si currezant).